Парафія сьв. Кірылы Тураўскага

Перамяненьне Гасподня - Яблычны Спас.

church — Thu, 12 Aug 2010 21:40:45 +0000

19 жніўня праваслаўныя беларусы сьвяткуюць Перамяненьне Гасподня - Яблычны Спас.
Царкоўнае святкаваньне зьвязана зь бiблейскiмi падзеямi.
Незадоўга да Галгофы Ісус Хрыстос узьняўся з трыма апосталамі – Пётрам, Якубам і Янам — на гару Табор у Галілеі. Там апосталы ўбачылi нечакана пераўтворанага Iсуса, у белых адзеньнях, з асьветленым сонцам тварам, i пачулi нябесны голас: “Гэта ёсьць Сын Мой Любiмы, у Якiм Мая добрая воля, Яго слухайце”. Значэньне пераўтварэньня ў тым, што Хрыстос паказаў людзям Сваю Боскую сутнасьць.
Яблычны Спас — самы шаноўны ў народзе, бо яблыня ў беларусаў – асаблівае дрэва. Вельмі пашырана было павер’е, што да Спаса нельга есьці яблыкі, бо дзеці будуць паміраць. Старадаўнiя паданьнi сьведчаць, што на тым сьвеце Бог будзе раздаваць на Спаса райскія яблыкі, а таму дзіцяці, што ўжо памерла, і чыя маці каштавала іх раней дазволенага тэрміну, пачастунку не дастанецца. Таму на Палесьсі, як і ў некаторых іншых мейсцах, на Спаса людзі нясуць на вясковыя могілкі яблыкі – яблыкі з драпінкамі на бакох, з жыцьцёвай сілаю беларускіх туманоў, добрых жаночых і моцных мужчынскіх рук, зь ніколі не забываемым восеньскім тонкім сакавітым пахам .
Лічілася, што на Яблычнага Спаса канчаецца лета. “Прыйшоў Пятрок — апаў лiсток, прыйшоў Iлья — апала два, прыйшоў Спас — пайшло лета ад нас”.
На поўдні часам ужо пачыналі сеяць азіміну.
У гэты дзень у царкве асьвячалi плады новага ўраджаю: “Спас — усяму час”.
У чацьвер, 19 жніўня 2010 году а 6-й гадзіне вечара, у царкве Сьвятога Кірылы Тураўскага адбудзецца сьвяточная Багаслужба, прысьвечаная Перамяненьню Гасподняму, альбо Яблычнаму Спасу.
Бярыце з сабою садавіну і агародніну. Запрашайце родных і знаёмых.

church — Tue, 29 Jun 2010 10:28:05 +0000

20 чэрвеня, у нядзелю, на 534 St. Clarens Ave., у Таронта ў Беларускай Аўтакефальнай праваслаўнай царкве сьвятога Кірылы Тураўскага сабралася шмат людзей, каб ушанаваць сьветлую памяць Уладыкі Мікалая. Успамінамі пра мітрапаліта БАПЦ падзяліліся Ўладыка Сьвятаслаў, айцец Мілан, спадарыня Марыя Ганько, спадар Барыс Кірка, айцец Васо, успаміны Раісы Жук-Грышкевіч зачытаў спадар Алесь Кот, успаміны спадарыні Івонкі Сурвіллы прачытала спадарыня Валянціна Шаўчэнка.
Прысутныя змаглі пазнаёміцца з фотаальбомамі Ўладыкі, ягонымі публікацыямі.
Пасьля імпрэзы ўсе былі запрошаныя на абед.

Троіца

church — Sat, 22 May 2010 14:00:48 +0000

У нядзелю, 23 травеня, праваслаўныя хрысьціяне адзначаюць Тройцу — сьвята, устаноўленае ў памяць сыходу Святога Духа на апосталаў. Гэта адно з найбольшых царкоўных сьвятаў, якое адзначаецца праз сем тыдняў пасьля Вялікадня, адсюль і народная назва — Сёмуха.
Паводле Бібліі, на пяцідзесяты дзень пасьля Уваскрэсеньня Хрыстовага дом, дзе сабраліся вучні Хрыста, напоўніў гул зь неба, і зьявіліся агнявыя языкі, якія кранулі апосталаў, пасьля чаго ў іх зьявіўся дар прапаведаваць на розных мовах.
На Сёмуху прыйнята ўпрыгожваць царкву й хаты бярозавымі, кляновымі і дубовымі галінкамі. Нашы продкі верылі ў іх магічную сілу ўплыву на моцнае здароўе, на багаты ўраджай.
Прыходзьце ў нядзелю, калі ласка, у нашую Беларускую Аўтакефальную Праваслаўную Царкву на сьвяткаваньне Сьвятой Тройцы, альбо Сёмухі.
Пачатак літургіі а 10-й гадзіне раніцы.

Дзень сьвятога Кірылы Тураўскага.

church — Tue, 11 May 2010 02:16:15 +0000

У нядзелю, 9 траўня, ў Беларускай Аўтакефальнай Праваслаўнай Царкве ў Таронта адзначалі Дзень сьвятога Кірылы Тураўскага.

Пра жыцьцё аднаго зь Вялікіх Айцоў нашай Беларускай Праваслаўнай Царквы расказаў пасьля сьвяточнай літургіі Япіскап Наваградзкі і Паўночна-Амэрыканскі Сьвятаслаў.

Сьвяты Кірыла Тураўскі – выбітны рэлігійны дзеяч 12 ст., япіскап г. Турава – ў спадчыне пакінуў шмат пісаных рэлігійных твораў, за што заслужыў назоў другога Залатавуснага. Частка пабожных твораў сьвятога Кірылы захаваліся да нашых дзён і зьяўляецца здабыткам беларускае літаратуры.

Уладыка Сьвятаслаў у сваёй прамове зачытаў урывак з твору «Бяседа сьв. Кірылы з манахам Варфаламеем»:

«Браце мой, служы цару зямному, але ніколі не забывайся пра Цара Нябеснага: многія, бо бязглуздыя, славячы зямнога цара дзеля карысьцяў, скора будуць пазбаўлены славы й пойдуць на дно пекла. Браце мой, дбаючы пра мірское, слухай голас Божы: прабываючы ў цемры, сьпяшы да сьвятла. Браце мой, бачучы нявольнікаў цела, што прыгожа жывуць, не зайздросьці ім: не сумуй зь беднаты твае, гледзячы на ўбогасьць рызаў сваіх, але лепш хадзі свабодны ў іх, чым паняволены ў другіх…»

Гады жыцьця Кірылы Тураўскага мы ведаем прыблізна. Мяркуецца, што ён нарадзіўся каля 1130 г. і памёр каля 1182. Мы маем толькі дзьве крыніцы жыцьцяпісу: “Жыціе Сьвятога Кірыла” невядомага аўтара канца 12 ст. і летапіснае паведамленьне ад 1169 г., у якім Кірыла Тураўскі прыгадваецца як Япіскап Турава.

Кірыла Тураўскі пакінуў нам у спадчыну 8 слоў-казаньняў, 2 прытчы пра душу і цела (пра сьляпога і кульгавага), 2 казаньні пра манаскі чын і анёльскі вобраз, 2 пасланьні да Васіля Ігумена Пячорскага, два каноны і каля 30 спавядальных малітваў.

28 красавіка – дзень памяці сьвятога Кірылы Тураўскага - Беларускага Залатавуснага.

Пра жыцьцё адных з заснавальнікаў Парафіі сьвятога Кірылы Тураўскага і Згуртаваньня Беларусаў Канады, цудоўных дзеячоў грамадзкага ды рэлігійнага жыцьця беларускай дыяспары Міколу Ганько (23 траўня 1923 году - 16 траўня 1999 году) і Аляксея Грыцука (3 ліпеня 1910 - 30 траўня 1976 году) расказала Вольга Іпатава – беларуская пісьменьніца, якая зьяўляецца ўкладальніцай кніжак Марыі Ганько “Каб сьведчылі пра Беларусь. Жыцьцё й дзейнасьць Міколы Ганько” і Вольгі Грыцук « Мы стваралі сваю Беларусь: жыцьцё і дзейнасьць Аляксея Грыцука».

Дарэчы, калі спадарыня Іпатава расказала пра тое, зь якою маленькаю драўлянаю валізкаю прыехаў Мікола Ганько ў Канаду, тую ж самую валізку як каштоўную рэліквію беларускай таронтаўскай суполкі і вынесьлі з бібліятэкі – зараз яна служыць дэкорам да сьпектакляў.

Сьвяткаваньне дня сьвятога Кірылы Тураўскага

church — Wed, 05 May 2010 23:04:28 +0000

Дарагія сябры.

У нядзелю, 9 траўня, пасьля сьвяточнай літургіі, якую адслужыць Япіскап Наваградзкі і Паўночна-Амэрыканскі Сьвятаслаў, парафіяльная рада запрашае Вас на сьвяткаваньне дня сьвятога Кірылы Тураўскага, імя якога зь вялікім гонарам носіць наша парафія ў Таронта.

Пра жыцьцё сьвятога Кірылы Тураўскага - багаслова, царкоўнага дзеяча, прапаведніка, старажытнабеларускага пісьменьніка, чые творы й сёньня захапляюць пранікнёнасьцю, прастатою і шчырым клопатам пра духоўную дасканаласьць людзей, раскажа Ўладыка Сьвятаслаў.

У траўні мы ўспамінаем адных з заснавальнікаў праваслаўнай парафіі сьвятога Кірылы Тураўскага і Згуртаваньня беларусаў Канады, цудоўных лідэраў, рэлігійных і грамадзкіх дзеячоў Міколу Ганько (23 траўня 1923 году - 16 траўня 1999 году) і Аляксея Грыцука, што нарадзіўся ў 3 ліпеня 1910 году і пакінуў гэты сьвет 30 траўня 1976 году.

Пра жыцьцё й дзейнасьць Міколы Ганько і Аляксея Грыцука 9 траўня раскажа беларуская пісьменьніца, узнагароджаная ордэнам «Знак Пашаны» і мэдалём Францыска Скарыны, былая старшыня Саюзу пісьменьнікаў Беларусі Вольга Іпатава.

Урачыстая імпрэза і абед пачнуцца а 12-00 гадзіне дня, пасьля багаслужбы, у парафіяльнай зале па адрасе: 524 St.Clarens Ave, Toronto (станцыя мэтро Lansdowne).

Давайце сустрэнемся ў такі цудоўны веснавы месяц і адсьвяткуем разам!

Рада парафіі сьвятога Кірылы Тураўскага

Дай, Божа, шмат год!

church — Fri, 23 May 2008 14:01:48 +0000

Рада Парафіі Беларускае царквы сьвятога Кірылы Тураўскага г.Таронта
запрашае ўсіх вернікаў і сябраў Царквы сказаць нашаму дарагому Уладыку Сьвятаславу:
“Іс полла эті Дэспота!”
(”Дай, Божа, шмат год!”)

на ўрачыстасьцях,
прысьвечаных гэтае вялікае для
Беларускай Аўтакефальнай Праваслаўнай Царквы падзее,
што адбудуцца 25 травеня а 12:00

ХІРАТОНІЯ АРХІМАНДРЫДА СЬВЯТАСЛАВА Ў ЯПІСКАПА БАПЦ

church — Sat, 17 May 2008 02:07:37 +0000

11 траўня 2008-га году ў Катэдральным Саборы сьв. Кірылы Тураўскага ў Брукліне, Ню-Ёрк, быў хіратанізаваны ў япіскапскую годнасьць а. архімандрыт Сьвятаслаў (Вячаслаў Логін). Абрад хіратоніі быў выкананы Архіепіскапам Уманскім і Дэтройскім Аляксандрам, епіскапам Барыспальскім Паісіям ды Япіскапам Х’юстанскім і Тэксаскім Макарыюсам у асысьце сьвятарства і пры ўделе вялікай колькасьці вернікаў зь Ню-Ёрку, Ню-Джэрсі і Канады.

Іс полла эті Дэспота, Дарагі Уладыка, Япіскап Наваградскі і Паўночна-Амэрыканскі БАПЦ, Сьвятаслаў!

Сьвяточныя службы на Вялікдзень

church — Wed, 16 Apr 2008 17:59:02 +0000

Беларуская праваслаўная царква
сьвятога Кірылы Тураўскага
г. Таронта

віншуе ўсіх вернікаў з надыходзячым
Вялікоднем і запрашае на сьвяточныя службы.Расклад набажэнстваў:
Schedule of Church Services:

20.04 Уваход Госпадавы ў Ерусалім … ЛІТУРГІЯ …10:00 раніцы,
Sunday PALM SUNDAY … LITURGY …10:00 am

24.04 ВЯЛІКІ ЧАЦЬВЕР…Сьв. ПАКУТЫ ХРЫСТОВЫ…7:00 вечара
(12 Дабравесьцяў)
Great and Holy Thursday … Reading of Gospels … 7:00 pm

25.04 ВЯЛІКАЯ ПЯТНІЦА…ВЯЧОРНЯ з вынасам Сьв. Плашчаніцы…6:00 вечара,
Great and Holy Friday … Vespers-Placing of the Holy Plashchanitza…6:00 pm
26.04 ВЯЛІКАЯ СУБОТА..ПАЎНОЧНЯ…11:30 уначы,
27.04 Уваскрасеньне Хрыстовае…Ранішня…00:00 уначы,
(нд.) В Я Л І К Д З Е Н Ь …ЛІТУРГІЯ …2:00 уначы,
E A S T E R
Асьвячэньне пасак……………………………..3:30 раніцы
ВЯЛІКОДНЫ МАЛЕБЕН і Сьвяткаваньне……………………..3:00 удзень

ХРЫСТОС УВАСКРОС ! САПРАЎДЫ ЎВАСКРОС !
Christ is Risen ! Indeed He is Risen !

Ён — уваскрос, Ён — дзесь між намі,
Ён там, дзе ў срэбным пыле лоз,
У сіняй смузе над палямі
Вісіць вясна… Ён уваскрос,
Ускрос,
і зноў па Беларусі
Імклівым крокам йдзе Хрыстос…
(Н. Арсеньнева)

Cлужбa з нагоды Запускаў на Вялікі пост

church — Thu, 06 Mar 2008 15:26:54 +0000

У нядзелю 9 сакавіка запрашаем усіх на службу з нагоды Запускаў на Вялікі пост.

Пасьля службы, з Божае міласьці, будзем гуляць шчодрую Масьленіцу.

Прыходзьце, калі ласка!

І не забудзцеся напячы бліноў

40 дзён

church — Thu, 06 Mar 2008 15:24:40 +0000

8 сакавіка спаўняецца 40 дзён, як адышоў у лепшы сьвет вялікі пісьменьнік, грамадзкі дзeяч, заснавальнік ЗБК, наш сябар – Кастусь Акула.

У гэты дзень, а 11:00 ў царкве сьв. Кірылы Тураўскага (524 St.Clarens Аve.) адбудзецца Паніхіда за ўпакой душы Кастуся Акулы.

Пасьля Паніхіды запрашаем на памінальны стол.